Pamilya sa napatay'ng polis modangop sa NBI-7

Modangop ngadto sa NBI-7 ang pamilya sa namatay nga polis sa dakbayan sa Lapu-Lapu human kini maunay sa kaubang polis atol sa pagresponde og alarma sa milabay'ng gabii didto sa Gen. Aviation Road, Pajac, Lapu-Lapu.

Sa pamahayag nga giluwatan ni Nora Ungria, asawa sa namatay nga si PO3 Rodrigo Bayadog Ungria, sakop sa kapolisan dakbayan sa Lapu-Lapu ang inahan ni PO3 Ungria nangusog sa pagdangop sa NBI-7 alang sa pag-imbestigar sa kamatayon sa iyang bana.

Matud pa ni Nora nga hangtud karon dili pa makadawat ang iyang pamilya sa nahitabo sa iyang bana ug aron way pagpinig sa pagahimuong imbestigasyon sa kapolisan sa Lapu-Lapu ila kining idangop ngadto sa laing ahensiya sama sa NBI-7.

Subay niini, hangtod ning pagbalita si PO1 Cristina Torres sa Investigation section sa kapolisan sa Lapu-Lapu mipasabot nga wa pa nila kapasakai og kaso si PO3 Rolando Pugoy gumikan sa taho nga ilang nasayran nga modangop ngadto sa NBI ang pamilya ni Ungria alang sa patas nga imbestigasyon.

Matud pa ni Lapu-Lapu City Police Chief, Supt. Louie Oppus nga iya nang gipaubos sa camp restriction si PO3 Pugoy samtang nagpadayon pa ang ilang gihimong imbestigasyon batok sa maong polis nga nakapusil ni PO3 Ungria.

Uyon usab si Oppus nga independent body ang mohimo ug linaing imbestigasyon aron way bahid sa pagduda ang resulta unya sa maong kaso.

Si PO3 Pugoy maoy nakaunay og posil patay ni PO3 Ungria atol sa ilang pagresponde sa usa ka armadong tawo sa Gen. Aviation Road sa Pajac Lapu-Lapu.

Si Joseph Brint Chiong nasikop atol sa operasyon.

Base sa imbestigasyon atol sa pagresponde ni PO3 Ungria ug PO3 Pugoy sa maong dapit nagkalayogay si Ungria ug Chiong diin miresulta nga nadasmagan si PO3 Pugoy nga back-up ni Ungria ug aksidente nga nakablit ni Pugoy ang gatilyo sa iyang baby armalite nga maoy hinungdan nga napusilan sa paa si PO3 Ungria ug namatay pag-abot sa Mactan Doctor's Hospital sa dakbayan sa Lapu-Lapu.