Hold departure batok sa Koreano

Gikatakdang moluwat og 'hold departure order' ang Bureau of Immigration 7 batok sa usa ka Koreyano nga nasikop sa kapolisan sa Lapu-Lapu gumikan sa paghupot niini og armas nga walay lisensya niadtong milabay'ng gabii.

Si BID 7 Regional Director Geronimo Rosas sa pakighinabi sa Banat News nga si Lapu-Lapu City police director, Supt. Louie Oppus maoy mipahibalo kaniya kabahin sa usa ka Kang Chang Woo nga walay mga dokumentong napakita kabahin sa pag-anhi niini sa nasud.

Dihang giimbestigar ni Rosas si Woo, kini gikatahong mirason nga ang iyang mga papeles lakip na passport tua sa Korean agency nga nagbase sa kauluhan nga maoy nagpasulod kanila dinhi sa Pilipinas.

Karong adlawa maoy katapusan tagal kang Woo inabagan sa iyang abogado sa pagsumiter sa maong mga dokumentos aron matino kun wala pa kini mag-overstay.

Sa pagkakaron si Woo gibutang sa kustodiya sa BID 7 samtang gihikay pa ang iyang kasong paghupot og kalibre 357 nga may lima ka buhing bala dihang siya nadakpan sa roadblock sa SWAT.