Duha ka pusher nasipong sa CIIB

Mga balay sa mga gidudahang tigpayuhot og drogas diha sa barangay Lorega-San Miguel ning dakbayan gironda sa hiniusang pwersa sa Criminal Investigation and Intelligence Branch, Vice Control Section, Special Weapons And Tactics kagahapon sa kaadlawon.

Ang nangasikop ug giilang sila si Nonelito Nellas, minyo ug molupyo sa Sitio Proper Lorega sa samang barangay nakuhaan og 18 ka medium size nga paketeng may sulod nga shabu.

Laing gidakop mao si Alfredo Hassamal, taga Sitio Sereas, nakuhaan og unom ka medium size nga paketeng shabu, duha ka linikit nga marijuana ug ubang gamit sa pagsuyop.

Samtang duha ka mga suspek usab ang nakaikyas sa maong ronda apan nakuhaan gihapon og mga ebidensyang magamit aron mapasakaan sila og mga kaso.

Ang nakaikyas giilang sila si Alvin Bantilles ug Fabian Rafols pulos nagpuyo sa Sitio Lawis. Nakuha sa panimalay ni Bantilles ang pito ka medium size nga paketeng shabu samtang 14 ka mga pakete ug laing 11 pa ka medium size nga paketeng pulos may sulod nga gidudahang shabu ang nakuha gikan sa panimalay ni Rafols.

Ang maong ronda pinasikad sa search warrants nga giluwatan nila ni RTC Judge Menrado Paredes ug Judge Fortunato de Gracia.