Usbaw sa suhulan sa Talisay employees giaprobahan na

Giaprobahan kagahapon sa buntag sa konseho sa Talisay atol sa ilang gipahigayong sesyon ang resolusyon numero 2006-39 nga nag-implementar og usbaw sa suholan sa mga kawani sa kagamhanan sa dakbayan.

Ang nahisgutang resolusyon compliance sa Budget Circular numero 2006-2 niadtong Marso 2 niining tuiga sa Department of Budget and Management nga naghatag og P1,000.00 nga usbaw nga suholan sa mga kawani sa gobiyerno.

Ang mga kawani sa gobiyerno makadawat na og P1,500.00 nga usbaw sa suholan base kini sa P500.00 nga existing nga usbaw ug ang dugang nga P1,000.00.

Kahinumduman nga si Presidente Gloria Macapagal Arroyo miluwat og Administrative Order (AO) niadtong Pebrero 28 niining tuiga paghatag og dugang usbaw sa suholan sa tanang kawani sa gobiyerno.

Ang nahisgutang resolusyon nga gipangamahanan ni Konsehal Arturo Bas tsirman sa komitiba sa appropriation, budget and accounts nag-awhag ni Mayor Socrates Fernandez nga mohatag og kamanduan sa City Budget nga i-prioritize ang pundo para sa usbaw sa mga kawani sa kagamhanan sa siyudad.