Dos anyos paig, 2 angol ug P600 mil gilamoy sa sunog

Napaig ang usa ka 2 anyos nga batang babaye human masunog ang balay sa iyang apuhan diha sa lungsod sa Badian alas 12 ang takna sa kaudtuhon sa miaging adlaw, samtang mikabat usab sa P600 mil ang danyos sa sunog nga miigo sa mga pribadong stalls sa merkado sa lungsod sa Bogo sa milabay'ng gabii.

Ang balay gipanag-iya sa managtiayon nga Sotero ug Agapita Rosiana, pulos 84 ang pangidaron ug nagpuyo sa Sitio Dapdap, barangay Bugas lungsod sa Badian

Si PO2 Jeremias Elardo sa Badian Police Station niasoy sa Banat News nga ang biktima mao si Karen, apo sa managtiayong Rosiana

Nadawat ang alarma sa sunog apan wa gayud makasulod ang bombero gumikan sa kahilit og agianan sa maong lugar ug ang mga balay ginama sa kahoy maong daling mikatap ang kalayo nga giubanan usab sa kusog nga hangin.

Matud pa sa kapolisan natulog niadtong tungora ang bata tupad sa lamparilya. Gituohang nasikaran kini sa biktima hinungdan sa sunog, gisuwayan unta pagtabang ang bata sa mga apuhan apan napakyas gumikan kay nakaangkon sab kini og grabeng paso sa ilang kalawasan.

Ang mga apuhan sa bata gidali paghatod sa Badian District Hospital. Samtang 10,000 pesos ang tanan nga danyos.

Sa laing bahin naugdaw usab ang 10 ka stalls sa pribadong merkado sa lungsod sa Bogo nga mikabat og P600 mil ang danyos niadtong Martes sa gabii diha sa Sitio Cantecson Barangay Gairan, Bogo.

Matud ni Senior Fire Officer 1Hermilo Sinadjan kagahapon sa Banat News nga ang kalayo nagsugod sa duha ka tapad nga stall sa videoke bar ug bodega sa mga dry goods nga gipanag-iya ni Maribel Cosmiano ug Arnold Arnado.

Ang kabomberohan sa Bogo gibasol sa mga residente sa lugar tungod kay wala makaresponde sa sunog hinungdan nga naugdaw ang maong mga stall.

Apan si Sinadjan nagkanayon nga wala sila makaresponde sa sunog tungod kay guba ang ilang Fire Truck og ang Medellin fire station maoy unang miresponde niini sunod angDaan Bantayan ug Sogod.

Gibutyag ni Sinadjan nga 20 minutos napatay ang kalayo sa sunog human miabot ang kabomberohan sa Medellin tungod kay 18 kilometros pa ang biyahion gikan sa Medellin paingon sa Bogo.

Si Sinadjan midungag nga gipaubos sa ika-duhang alarma ang nahisgutang sunog ug giimbestigahan pa ang hinungdan niini.