Pulong-pulong sa militar

Gihimulsohan karon sa mga kadagkoan sa militar ang tanang mga sundawo sa nasud aron masayran ang ilang sentimento ug kalikayan na ang mga hunahunang moalsa batok sa gobyerno.

Mao kini ang katuyoan sa gihimong "Talakayan" kon pulong-pulong sa mga sundawo sa Cental Command nga nagbase sa Camp Lapu-Lapu sa barangay Lahug ning dakbayan sa Sugbo.

Gipangunahan ang maong panagtagbo sa mga kadagkoan sa Civil Relations Services Group (CRSG) sama kang Brig. Gen. Jaime Buenaflor ug gani mitambong niini si Kalihim Ricardo Saludo.

Matud pa ni Gen. Buenaflor nga ang CentCom-Visayas maoy ikaduhang kampo sa mga sundawo sa nasud nga ilang giduaw ug gihimo ang pulong-pulong tali sa mga opisyal niini.

Isunod na usab nila ang ubang mga buhatan sa Centcom sa nagkalainlaing lugar sa nasud aron motunhay ang maayong relasyon sa mga opisyal ug sa mga ultimong sundawo.

Matud pa ni Buenaflor nga gawas nga paminawon nila ang sentimento sa mga sundawo, ila usab nga giplastar ang mga programa karon sa gobiyerno nga una sa tanan mao ang pagpatukod og mga panimalay sa mga sundawo ug ang pagpauswag sa ilang mga allowance.