Polis napatay sa polis

Polis napatay sa iya ra usab nga back-up nga polis atol sa pagtubag og alarma diha sa Pajac, Lapu-Lapu niadtong nakalabay'ng gabii dihang gikatahong nahitabo ang panaglayog sa biktima ug suspek nga ilang dakponon.

Giingong nakiglayog si PO3 Rodrigo Ungria, hingkod ang panuigon, minyo ug nadestino sa Police Station 4 sa suspek nga si Joseph Brent Chiong niadtong tungura dihang aksidenteng nakablitan ni PO3 Roland Pugoy ang iyang armas ug didto miigo sa walang bitiis sa kauban.

Sa imbestigasyon ni PO3 Manolito Abellanosa sa homicide section nga mitubag ang duha sa alarma kabahin sa armadong lalaki diha sa Indiana Aerospace University sa Kagudoy, Basak sa maong dakbayan.

Nasuta nga ang suspek nga si Chiong nga giingong dunay armas ug nanghasi sa maong lugar apan nakalakaw na kini gikan sa maong tunghaan ug pauli na sa ilang lugar sa Pajac.

Nagdali sa pag-apas sila si Ungaria ug Espinosa diin ilang naabtan si Chiong diha sa daplin sa dalan uban sa mga kabarkada niining nag-inom diha sa Pajac.

Giingong dihang giduol ug giaresto ni PO2 Ungria si Chiong, kalit kining mikisi-kisi hinungdan nga nahitabo ang panaglayog nila ni Ungria samtang si PO3 Pogoy nga naggunit sa M4 rifle niini naigking nalang dihang naligid sa iyang gibarugan ang duha hinungdan nga aksidenteng napabuto ang iyang armas tumong sa paa sa biktima.

Daling gihatod ni Pogoy si Ungria sa tambalanan apan dangtan og pila ka oras nakabsan kini sa kinabuhi gumikan sa grabeng pagkaigo sa bitiis niini nga gituohang natumong sa dakong ugat.

Si Pogoy gipailawom sa technical arrest subay usab sa kamandoan ni Supt. Louie Oppus samtang gihikay pa ang lawom nga imbestigasyon.

Dunay mga pagdudang posibleng gisuwayan og pusil ni Pogoy ang suspek apan sa paghimo niini nasipyat ug naigo hinuon si Ungria. Samtang si Chiong kinsa maoy tuyo sa duha naaresto usab sa mga polis. - Uban sa taho ni Romeo T. Limpangog