351 ka 'tikasang' timbangan nakumpiskar

Daghan gihapon sa mga manindahay sa Carbon Market ug ubang dapit dinhi sa dakbayan sa Sugbo ang padayong nigamit sa mga tikasang timbangan aron makaganansiya og daku sa ilang mga paninda.

Kagahapon sa buntag laing 351 ka mga tikasang timbangan nga nasakmit sa Market Operations Taks Force ang gipangdugmok diha sa atubangan sa Cebu City Hall nga gisaksihan gyud mismo ni acting Market Administrator Elpedio dela Victoria.

Ang maong mga tikasang timbangan nasakmit sa gilusad nga operasiyon sa market operations division niadtong milabay'ng bulan sa Pebrero ug Enero ug dunay uban niini ang nasakmit niadtong Disyembre sa milabay pang tuig.

Ang kagamhanan sa dakbayan sa Sugbo padayon karung nihingusog sa pagmonitor niadtong mga manindahay nga mogamit og mga tikasang timbangan aron mapanalipdan ang interes sa mga konsumidor nga maoy mabiktima niini.

Gitug-an sa usa ka kawani sa buhatan sa market division dihang nahinabi sa Banat News nga lisud gyud masumpo ang pagamit og mga tikasang timbangan sa mga limbungan nga manindahay gumikan kay bisan pa og ma-isyohan na kini og calibrated nga timbangan ilaha gihapong manehu-on og liso ang timbangan aron makapanglimbong.

Kadtong mga manindahay nga masakpang mogamit og tikasang timbangan pabayron og multa nga P500 adto sa City treasurers office ug i-calibrate ang timbangan niini una pa itugyan og balik.