Doktorang Swedish, patay

Usa ka doktora nga langyaw ang napalgang patay ug nagbuy-od sa iyang lawak nga giabangan pasado alas 12 sa udto sa miaging adlaw sa Sitio Alangasil, Barangay Mactan dakbayan sa Lapu-Lapu.

Sigun sa report sa Homicide Section sa Lapu-Lapu ang biktima naila nga si Dr. Mary Cristina, Britt Ell-Singer, 55, anyos usa ka Swedish National, adunay live-in partner ug kasamtangan nagpuyo sa Vusta Del Mar sa Sitio Alangasil ning siyudad.

Base sa gihimong imbestigasyon sa Homicide Section sa Lapu-Lapu pinaagi ni SPO3 Francisco Bagiuo ug mga kaubanan, napalgan sa live-in partner nga si Thomas Bill Anderson ang biktima nga nagkulob ug wala nay kinabuhi.

Matud pa ni Anderson nga adunay gihambin nga sakit sa tiyan si Ell-Singer sa pag-abot dinhi sa Pilipinas, nga bisan paman sa kadaghan na sa giinom nga tambal, wa kini maayo.

Si SPO2 Alcon Escosora sa homicide matud niya nga human sila nakadawat og tawag sa ilang buhatan sa kauban sa langyaw nga si Mike Yngve Kjellgren, ila dayon giadto ang dapit.

Ang homicide nakakuha og mga tablitas, nga Loperamide, Imodium, Oneprazol, tanan pulos sakit sa tiyan laing nakuha mao ang Passport, Personal Identification Card sa Bureau of Immigration.

Ang patay'ng lawas anaa karon gidala sa Cebu Rolling Hills, ug ipaubos sa autopsy.