9-anyos gilugos sa 4 ka bata

Naghilak nga mitaho sa iyang ginikanan ang usa ka 9 anyos nga batang babaye human gitabangan sa paglugos sa upat ka batang lalaki nga nagpanuigon og 7 ngadto sa 9 anyos.

Ang pagpanglugos nahitabo sayo sa miaging gabii sa reclamation area nga sakop sa Asinan, Mantuyong, Mandaue.

Ang ginikanan sa biktima nga sila si Analie ug Benjamin nga pulos hingkod ang panuigon nga nagpuyo sa sitio La Purisima, Guizo dali nga mitaho sa kapolisan sa Presinto 1 sa Centro Police Station.

Matud sa asoy sa inahan sa biktima kang SPO1 Pedro Sucion nga gisugo kini niya sa pagpalit og hilo nga gamiton sa pagbugkos sa gihimo niyang chorizo.

Naglakaw na kini pauli sa ilang panimalay ug maoy nasugatan sa biktima ang upat ka mga suspetsadong mga bata nga sila si Mike, Jikoykoy, Caloy ug Zemart (mga dili tinuod nga ngalan) ug gipugos sa pagdala ngadto sa reclamation area.

Didto sa awaaw nga dapit sa reclamation area ang upat ka mga bata nagpulipuli sa pagpanamastamas sa biktima.

Si SPO1 Pedro Sucion sa Police Station 1 maoy naghimo og pakisusi ug gidala ang biktima sa Pinkroom sa Vicente Sotto Memorial Medical Center sa dakbayan sa Sugbo ug ang resulta maoy gipaabot alang sa tukmang pagpasaka niini og kaso.