CICC pabilo sa kalambuan sa Mandaue

Giisip nga pabilo sa kalamboan sa syudad sa Mandaue ang katukuran sa Cebu International Convention Center sa reclamation area alang sa umaabot Asean Summit.

Kini ang gipadayag ni Mayor Thadeo Ouano human nahingpit na ang kasabutan tali sa probinsiya sa Sugbo ug sa syudad nga matukod na ang maong proyekto.

Matud pa ni Ouano nga sa higayun nga anaa na ang CICC, ang mga luna nga duol niini mao na unya ang tutukan pag-ayo sa mga negosyante.

Ang CICC gipaabot nga mobarug sa 3.8 ektaryang luna sa Mandaue reclamation area nga dunay kinatibuk-ang gidak-on nga 200 ka ektarya.

"I believe this new area in the city will be something to see in Mandaue," nagkanayon si Ouano.

Gawas sa CICC, anha usab mobarug ang Cebu International Trade and Exhibition Center nga giduso na sa NEDA ngadto sa JICA alang sa pondo.

Ang Cebu Doctors University nagsugod na usab sa pagtukod sa ilang edipisyo sa maong lugar.

Sa pagkakaron, ang dakbayan sa Mandaue duna na'y kapin sa 10,000 ka mga patigayon hinungdan sa pagpilo-pilo sa tinuig nga kita niini sulod sa siyam ka tuig nga pagdumala ni Ouano.

Gipasabot ni Ouano nga mahigalaon ang syudad ngadto sa mga negosyante.

"In Mandaue City, we do not collect sales tax from business," sumala pa sa mayor.

Dugang pa ni Ouano nga ang pagdaghan sa pamatigayun sa syudad nagagumikan kini sa kamahigalaon ngadto sa mga negosyante.