Resthouse sa KFR gang natultolan

Dugang ebidensiya sa upat ka sakop sa kidnap-for-ransom group ang nasakmit sa Provincial Intelligence and Investigation Branch sa giingong safehouse sa grupo sa sityo Motorpool, Barangay Gun-ob, Dakbayan sa Lapu-Lapu.

Ang maong safehouse gipanag-iya sa usa ka Sharon Baligasa nga taga dakbayan sa Dipolog kinsa wala atol sa pagsuhid sa elemento sa PIIB ug ang nahabilin mao lang ang caretaker nga si Alfredo Briones.

Matud pa sa hepe sa PIIB, Supt. Juanito Enguerra, nga niadto pang Huwebes nila gipanid-an ang lugar apan niadtong Sabado lang nila gironda.

Nakuha sa maong panimaye mao ang walo ka plate numbers sa sakyanan, duha ka pares nga uniporme sa kapolisan nga walay name plate, duha ka sakuban sa pistola, usa ka duwaan nga break game, upat ka PNP badge nga may marka nga special agent apan walay serial number, duha ka sweetshirts sa PNP, usa ka notebook, usa ka yunit nga telebisyon, gamit sa kusina, balde nga puno sa ihi, foam nga higdaanan, gamay nga tangke sa LPG, kadena nga may kandado, bonnet ug panyo nga gilubid.

Base sa asoy ni Briones nga usa sa mga suspek nga si Jessie Pepino ang nagpaila kaniya nga usa ka engineer ug contractor sa dihang nipuyo kini sa balay niadtong Disyembre 3 ug niabang og tag P12,000 ang buwan.

Mao nalang ang nakit-an ni Briones ang hulagway ni Pepino sa mga pamantalaan sa dihang nasikop kini sa tugpahanan sa Mactan.

Sa iyang bahin, si Enguerra nagdumili pagbutyag kon base sa ebidensiya nga ilang nahipos, may nadagit naba kini nga gitago-an sa maong safehouse.

Padayun pa gihapon nga gisundan sa kapolisan ang lihok sa upat human kini nakapiyansa sa kasong usurpation of authorities sa dihang nasikop sa tugpahanan sa Mactan human nagpailang mga awtoridad.

Kauban ni Pepino mao sila si Crisologo Puzon, Ronald Pepino ug si Richard Orayan