Mga mananagat nanghangyo ni Michell

Mi-apelar ngadto sa negosyanteng si Michell Lhuillier ang mga mananagat nga nagpuyo sa duha ka barangay sa Borbon sa paghunong sa pagpangoral sa baybayon nga maoy hinungdan nga maglisud na sila sa pag-agi paingong managat.

Si Paterno Branzuela Jr., tigpamaba sa Magay Fishermen's Association sa Barangay Binggay, nagkanayon nga apetakdo kaayo ang panginabuhian sa mga pamilya nga mananagat sa maong barangay tungod sa gitukod nga proyektong Club Pacific nga usa ka beach resort ug golf course.

Gawas sa Binggay nga adunay 59 ka mananagat nga naghugpong ug narehistro sa Department of Labor and Employment, apektado usab ang 86 ka mananagat sa Barangay Camposong nga gipanguluhan sa presidente niining si Alejandro Salugaol.

Matud ni Branzuela ug Salugaol nga miduol na sila sa tagsa-tagsa nila ka kapitan ug sa mga opisyal sa maong lungsod, apan wala kini nahimo pagpakgang sa pagpangoral.

Si Bokal Agnes Magpale misuway na og duol kang Lhuillier pagkumbinser niini nga hatagan og agianan ang mga mananagat paingon sa baybayon, apan wala kini magsilbe tungod kay gikunsulta hinuon ni Lhuillier ang iyang administradora sa maong proyekto nga si Sonia Phua.

"Kahibalo man mi nga manggiluy-on na ug may malumo na siyang kasingkasing si Lhuillier. Manghangyo lang mi niya nga tan-awn among kahimtang... wa mi agianan paingon sa dagat," si Salugaol nagkanayon.

Naabot kini sa kapitolyo ug sa Ombudsman, apan wala gihapoy positibong resulta.

Matud hinuon ni Branzuela nga mipasalig na kanila si Kongresista Red Durano sa ikalimang distrito nga tabangan sila nga mahatagan og agianan. - Darrel Carumba Polis angol sa aksidente Ni Rey Pasaporte

Naangol ang usa ka polis ug anaa sa kritikal nga kahimtang ang iyang angkas sa dihang nabangga ang ilang gisakyan nga motorsiklo sa usa ka mini-bus sa miaging gabii pasado alas 11:00 ang takna sa National Highway sa Lagang, Ocaña, Carcar.

Sigon sa report sa Traffic Division sa Carcar Police Station nga nahipos sa Banat News nasayran nga ang polis naila nga si PO2 Christopher Mendaros, 28-anyos, ulitawo, nanimuyo sa Sangat, San Fernando ug kasamtangan nga nadestino sa Carcar Police Station.

Samtang ang iyang angkas naila nga si Alexander Velez, 22-anyos, ulitawo, taga Sangat, San Fernando.

Si PO3 Reynaldo Fuentes sa Traffic Division mitug-an nga samtang nagdagan ang motorsiklo nga gimaneho sa polis nga si Mendaros kalit lang nga mi-u-turn ang ilang gisundan nga mini-bus nga nagdala sa ngalan nga Moonshadow ug adunay plaka GWE-854 nga gimaneho ni Floreses Sagolili, 32-anyos, minyo, taga Perilos sa lungsod sa Carcar.

Gumikan sa kakalit sa pag-U-turn sa minibus hinungdan nga wala na maka-break ang polis ug nadasmag kini sa maong sakyanan ug nangalagpot ang mga biktima sa karsada.

Si PO2 Mendaros nakaangkon og mga pangos ug samad sa iyang lawas samtang ang iyang angkas nga si Velez anaa karon sa kritikal nga kahimtang gumikan sa kagrabe sa mga samad ug bun-og nga iyang nahiaguman ug anaa pa karon sa intensive care unit sa Cebu Doctor's Hospital.

Gidugang ni PO3 Fuentes sa Traffic Division nga ang drayber sa mini-bus ila na karong gitanggong sa bilanggoan, samtang ila nang giandam ang tukmang sumbong nga ipasaka sa hukmanan batok ni Sagolili. - Rey Pasaporte