Ang bag-ong warden sa BBRC Chief Inspector Efren Nemeño maoy nangusog aron mapatuman ang maong programa nga gitumong aron pagpaminus sa gidaghanon sa mga piniriso nga naghuot karun diha sa maong bilanggoan.
Apan giklaro sa warden nga sa 194 ka mga piniriso nga gitakda na untang ipadala sa Muntinlupa duna lay 150 niini ang aprobado na ug nakumpleto ang mga rekisitos sa pagpabalhin niini ngadto sa Muntinlupa.
Atol sa sinimanang tigum sa Police Coordinating and Advisory Council (PCAC) niadtong Biyernes gibutyag sa warden nga pagkakarun miabot na og 2,510 ang tanang mga piniriso sa maong bilanggoan nga duna lang untay kapasidad ngadto sa 250 ngadto sa 500 ka mga piniriso.
Gawas sa panaghuot sa mga piniriso mi-anam usab kagamay ang mga jailguards niini ilabi na kay dunay 24 ka mga jailguards ang giparelibohan ni Nemeño karun lang bag-o human masakpi nga nalambigit sa ilegal nga kalihukan sama sa pagpayuhot og gidiling drugas ug gani dunay pipila niini ang gipasakaan na og kasong administratiba sa rehiyonal nga buhatan sa BJMP.
Sa 24 ka mga jailguards nga giparelibohan siyam lang niini ang gihulipan hinungdan nga mokabat na lang sa 88 ang tanang mga personnel diha sa maong bilanggoan.
Alang sa warden nga sa matag usa ka jailguards pito ka mga piniriso ang tugbang niini sa matag shifting nga layo ra kaayo sa nahitabo karon sa BBRC nga tungod sa grabing pagdaghan sa mga piniriso nahulog na hinuon nga 20 sa matag usa ka jailguards.