Atol sa press conference kagahapon sa buntag gipadayag sa jailwarden nga sagad sa maong mga jailguards gipasakaan niya og kasong administratiba nga pending karon sa ilang rehiyonal nga buhatan sa Bureau of Jail Management and Penology (BJMP-7).
Gitug-an ni Nemeño nga medyo nahinayhinay na og sumpo ang mga kahiwian nga mikatap kaniadto diha sa maong bilanggoan gumikan sa estriktong mga polisiya nga iyang gipatuman sukad sa pag-asumer pagka warden usa ka bulan na ang milabay.
Matud ni Nemeño usa sa mga palisiya nga iya karung gipatuman diha sa maong bilanggoan mao ang pagpa-rekisa sa mga modalaw sa piniriso gikan sa pagsulod niini ug hasta sa paggawas.
Tungod kini sa report nga iyang nadawat pinaagi sa text messages nga dunay magpaka-aron-ingnon nga modalaw og piniriso diha sa maong bilanggo-an apan ang pagpamalit og shabu ang tuyo niini.
Duna say pinili nga mga sakop si Nemeño nga gitahasan aron maoy mo-rekisa sa mga jailguards aron gyud pagseguro nga walay jailguards ang nalambigit sa mga kahiwian ubos karun sa iyang pagdumala sa BBRC.
Gitug-an niya nga sa 24 ka jailguards nga iyang giparelibuhan siyam lang niini ang gihulip sa ilang rehiyonal nga buhatan nga nakapasamot og kagamay sa ilang mga personnel nga duna na lay 88 ka buok.