Rudy di pa moasumer

Dili pa mo-asumer si Mambaling Barangay Captain Rodulfo "Rudy" Estella isip temporaryong presidente sa Association of Barangay Councils (ABC) bisan og gibakante na ni ABC president Eugenio Faelnar ang maong posisyon aron respitohan ang 90 ka adlaw nga preventive suspension nga gipatuman sa Department of Interior and Local Government (DILG).

Gibutyag ni Estella dihang nahinabi sa Banat News nga gipahibalo siya personal ni Faelnar niadtong miaging gabii kabahin sa iyang temporaryong pagdumala sa liga samtang serbisyohan niini ang maong suspension order apil na ang tanang opisyal sa liga.

May labot kini sa reklamo sa kanhi project engineer sa ABC nga si Leah Rondez nga naningil sa iyang disbursement allowance sa gasolina nga pending karon sa Sandiganbayan 4th division.

Gani kagahapong adlawa nagtagbo sila si Estella ug Faelnar alang sa gitakdang temporaryong pag-asumer ni Estella sa maong posisyon.

Matud ni Estella nga karon pang Lunes sunod semana siya mo-asumer sa ABC gumikan kay paabuton pa niya ang confirmation gikan sa nasudnong Liga sa ABC pinangulohan ni James Marty Lim aron hatagan og kopya niini si Mayor Tomas Osmeña ug ang mga sakop sa konseho aron ilhon siyang temporaryong presidente sa liga.