Polis sa Talisay gipatay sa SRP

Patay ang usa ka polis sa Talisay human kini pusila sa wala mailhing kriminal niadtong Huwebes sa gabii diha sa Cebu South Coastal Road habig sa Sityo Laray Barangay San Roque, Talisay utlanan sa dakbayan sa Sugbo samtang kini gituohang nakig-date sa usa ka wala pa mailhing babaye.

Si SPO2 Teofanes Castro, minyo ug nagpuyo sa BF Homes, Mojon, sa Talisay ug nadestino sa Talisay City Traffic Division nakaangkon og usa ka samad pinusilan sa iyang ulo diin miungot pa ang bala niini hinungdan sa iyang hinanaling kamatayon.

Si Castro naabtan na lang sa iyang mga kaubang polis sa Talisay nga miresponde sa hitabo nga nag-ubo diha sa karsada nga wala nay kinabuhi.

Ang pitaka ni Castro nga dunay sulod nga salapi nga wala mapiho ang kantidad, 9mm pistol nga service firearm ug 6230 nga cellphone wala na usab diha sa posesyon niini.

Si Supt. Audie Villacin nagkanayon sa Banat News nga dunay posibilidad may kalambigitan sa babaye ang hinungdan sa krimen sanglit dunay nakakita ni Castro nga dunay kuyog nga babaye ug ang duha niadtong tungora nga nag-estambay diha sa lugar.

Matud ni Villacin nga naabtan nilang abli ang tuong pultahan dapit sa front seat sa Sportage nga sakyanan ni Castro ug nagtukar pa ang stereo ug aduna usab silay nakitang buak nga botelya sa usa ka red wine.

Ang maong botelya maoy nakapalig-on sa teyoriya nga dunay babayeng kauban ang biktima sa pagkahitabo sanglit giingong dunay kauban ni Castro ang mitug-an kang Villacin nga red wine gyud maoy idalit ni Castro ngadto sa mga babayeng kuyogon niini.

Wala pay nakuhang kasayuran ang mga imbestigador kabahin sa giingong babayeng kauban ni Castro niadtong tungura sanglit wala na kini sa maong lugar dihang nangabot ang mirespondeng kapolisan.

Samtang si Cebu Provincial Police Office Director Vicente Loot mitug-an nga gawas sa love triangle nga anggulo, ila usab subayon ang motibong pagpanulis sanglit nangawala ang mga personal nga gamit sa biktima lakip na armas niini, ug ingon man ang anggulong posibleng "job related" ang motibo.

Dugang pa niini nga dunay nakakita'g puting kotse nga kusog kaayong mipasutoy palayo sa maong lugar niadtong tungora nga abi sa mga residente og nag-drag race apan nahibulong silang walay kaatbang nga awto.

Ang patay'ng lawas ni Castro gidala sa Rolling Hills Funeral Parlor sa Banilad para sa autopsy aron mapiho kun ang armas ba niini ang giunay sa pagpusil kaniya.