Kuwarta sa Australian gisibat sa boring

Usa ka Australian national nga nagdala og boring nga babaye sa sulod sa lawak sa gipuy-an niining hotel sa downtown area sa dakbayan sa Sugbo gikawatan og dakong kantidad nga salapi.

Ang biktima mao si Karl Dahmer, 60 anyos, minyo nga taga Queensland, Australia ug temporaryong nagpuyo sa usa ka inn sa dalan Manalili niining dakbayan.

Nahanaw sa biktima ang mokabat $1,770 nga papel de bangko ug P2,000 kapin nga salaping Pilipinhon ug uban pang mahalong butang sa biktima.

Si SPO1 Manuel Mergallo sa Fuente Police Station nga gikahinabi sa Banat News miingon nga gidala niya ang boring nga gikaila niini sa dalan Colon sa miaging gabii sa kondisyon niini nga bayran og salapi bugti sa daklit nga kalipay.

Matud ni SPO1 Mergallo nga dugang asoy sa langyaw ngadto kanila nga dihang didto na sila sa sulod sa lawak niining gipuy-an daw gibahoan niini hinungdan sa pagsulod sa maong langyaw sa banyo aron sa pagkaligo apan nahingangha na lamang kay sa paggawas niini gikan sa banyo kalit lang nahanaw ang maong boring.

Gipangita sa langyaw ang maong babaye sa gawas sa lawak ug ang guwardiya nga gipangutana maoy nagtug-an nga migawas na ang maong babaye.