Top 10 sa high school naghikog

Usa ka tinun-an sa high school nga naapil sa top ten gituohang naghikog pinaagi sa paghigot og pisi sa liog tungod sa pagkamatay sa iyang apohan.

Nadiskubrehan sa mga sakop sa pamilya ang biktima alas 3 sa hapon niadtong miaging adlaw didto sa sulod sa lawak sa gipuy -an niining panimalay sa Tabok, Calamig sa Danao.

Si SPO4 Teofilo Deguilmo sa Danao Police Station miila sa biktima nga mao si Gonzalo Gomez Gamboa, 18 anyos, ulitawo ug 4th year student sa Carmen National High School ug nagpuyo sa panimalay sa igsuon sa nahisgotang dakbayan.

Matud pa ni Deguilmo nga namatay ang apohan niini nga maoy nagpatungha sa biktima ug kanunay na kining mopalta sa klase.

Dugang pa ni Deguilmo nga maoy ilang pagtuo nga gikaguol kaayo sa biktima ang pagka-ubos sa grado niini nga maoy nakaingon sa paghikog.

Hinuon ipadayon sa kapolisan ang paghimo pakisusi sa pagsuta gayod sa hinungdan sa nahitabong paghikog niini.