Nasikop sa airport KFR gyud diay - PIIB

Gikompirmar sa Provincial Intelligence and Investigation Branch nga mga sakop sa kidnap for ransom (KFR) group ang upat ka armadong mga tawo nga nasikop sa Mactan Cebu International Airport niadtong Domingo.

Kini base usab sa pakisusi nga gihimo sa PIIB sa Presidential Anti-Crime Emergency Response sa kauluhan.

Apan matud pa sa hepe sa PIIB, Supt. Juanito Enguerra, nga walay target nga dagitonon ang maong grupo sa ilang pag-abot sa Sugbo ug sukwahi sa nahaunang taho nga dunay duha ka negosyante nga ilang dagiton.

Matud pa ni Enguerra nga dunay laing tuyo ang upat ka armadong tawo apan wala niya gibutyag kon unsa ang maong mga tuyo sanglit nagpadayun pa sila sa pagsunod sa ilang kalihukan bisan nakagawas na kini sa Sugbo.

Sa mga dokumento nga nahipos sa PIIB, ang tulo nailhan nga sila si S/Sgt. Jessie Pepino, Sgt. Crisologo Puzon ug Confidential Agent Ronald Pepino base sa General Order ug Special Order gikan sa Intelligence Service sa Camp Aguinaldo.

Wala ang pangalan sa ikaupat nga suspek nga si Richard Orayan.

Apan sumala pa ni Enguerra nga kwestiyonable ang maong mga dokumento sanglit pirma ni kanhi Presidenti Corazon Aquino ang anaa sa General Order nga unta ang Adjutant sa Camp Aguinaldo man lang ang mopirma niini.

May depekto usab ang Special Order nga pirmado ni Col. Salvador Escobar, ang group commander sa Military Intelligence Group-15, sanglit nagsunod ang serial number ni Pepino ug Puzon.

Ulahi na nga nasayran sa PIIB nga mga sakop sa KFR group ang upat ka suspek sanglit gibuhian na kini sa mga awtoridad human nakapiyansa og tag P10,000 matag usa kanila sa kasong usurpation of authority sa ilang pagpaila nga mga awtoridad sulod sa MCIAA.

Samtang gipasalig sa hepe sa Cebu Police Provincial Office, Sr. Supt. Vicente Loot, ngadto sa mga negosyante sa Sugbo nga luwas sila gikan sa mga KFR groups.

Matud pa ni Loot nga walay nagbase sa Sugbo nga mga kidnappers ug gihimo lang nga tagoanan ang mga lokal nga kriminal human sila makabiktima sa ubang lugar.

Gipatawag na ni Loot ang mga notadong kriminal sa Sugbo sa dili pagtugot nga sila gamiton nga tagoanan.

Gihangyo usab ni Loot ang mga negosyante nga mokooperar sa kapolisan sama sa pag-amping ug pagtaho kon may mamatikdan nga sila ang tuyo.

Dugang pa ni Loot nga dunay ilang mga tawo gikan sa kauluhan nga moanhi sa Sugbo aron makighinabi sa mga negosyante labot sa ilang seguridad batok sa mga kidnappers.