Wa pay suspek sa tulis sa Exquisite

Ang kapolisan sa Presinto 2 sa Subangdaku Police Station sa dakbayan sa Mandaue wala pay matumbok nga pundok nga maoy nagtulis sa Exquisite Pawnshop and Jewelry Shop niadtong milabay'ng adlaw.

Mokabat sa P6 milyones ang kantidad sa mga alahas ug salapi ang nasakiyo sa tulo ka armadong tulisan nga nagsakay og aura nga motorsiklo.

Si PO2 Alin Caredo sa nahisgotang presinto maoy mipadayag niini sa Banat News kagahapon sa buntag.

Matud pa niya nga posible nga gikan sa laing lugar ang maong pundok ug mokalit lamang sa pagtumaw sa dakbayan ug manulis.

Dugang pa niya kon basehan ang mga pamahayag sa mga kawani maisip nga propesyonal ang maong pundok kay hangtod ang guwardiya wala man makaugpo niini.

Si PO2 Caredo miingon nga lakip karon sa ilang gihimoan og pakisusi ang mga background sa mga kawani ug sa security guard on duty aron sa pagsiguro kon wala bay kakonsabo sa maong pagpanulis.

Ang maong pawnshop nga gipanag-iya sa pamilyang Quisumbing mao usab ang nanag-iya sa Norkis Trading nga nag-ukopar og luna nga gitinguhang kuhaon og balik sa kagamhanan sanglit napakyas kini sa pagtuman sa mga kasabutan.