Awto nahagbong sa Transcentral

Nahiagom og mga pangos ug bun-og sa lawas ang usa ka babaye nga medical representative sa usa ka kompaniya og tambal human mahagbong ang iyang gimanihong awto didto sa Cebu Transcentral Highway kagahapon mga las 9 sa buntag.

Ang biktima mao si Ritchie Mediabella, 22-anyos, dalaga ug lumad nga taga Bacolod City, Negros Occidental ug kasamtangan nga nanimuyo sa dakbayan sa Sugbo. Si Mediabella nag-alagad isip usa ka medical representative sa Abbot Philippines nga anaa magbase sa dakbayan sa Mandaue.

Sigon sa asoy ni PO2 Julius Obaniana sa Balamban police Station sa Banat News nasayran nga samtang nagmaniho si Mediabella sa iyang awto nga Honda Civic nga adunay plaka nga WTB-380 paingon sa lungsod sa Balamban, kalit lang nga wala na makontrolar ang manobela tungod sa kakusog sa dagan hinungdan nga didto siya malahos sa pangpang nga dapit sa Sitio Mayana, Gaas sa nahisgutang lungsod.

Gibanabana ni PO2 Obiniana nga adunay giladmon nga 50 ka tiil ang nahagbungan sa awto ni Mediabella ug hangtod karon wala pa makuha ang sakyanan niini didto sa maong dapit.

Si Mediabella maisip nga gisuwerte pa bisan sa giladmon sa natagakan sa iyang awto gumikan kay igo lang kining nahiagom og bun-og ug mga pangos sa iyang lawas hinungdan nga dali kining gidala sa usa ka pribadong tambalanan dinhi sa dakbayan sa Sugbo.