P6-M alahas nadala sa mga tulisan: Lakip nang wa matinong kantidad sa salapi

Mikabat sa P6 milyones ang kantitad sa mga alahas walay labot sa salapi nga wala mapiho ang kantidad ang nadala sa tulo ka wala mailhing tulisan nga mitulis kagahapon sa alas 12:40 sa udto sa Exquisite Pawnshop ug Western Union sa dalan A.S. Fortuna, Bakilid Mandaue.

Ang nahisgutang pawnshop ug Western Union nahimutang sa usa lang ka kuwarto.

Gibutyag kagahapon sa hapon ni SPO4 Raul Noynay polis sa Mandaue nga usa sa maong mga tulisan nga gibana-bana nga 20-anyos ang panugion misulod sa Western Union ug mipasangil nga magpadala og kuwarta.

Ang duha ka kauban niini nga gibanabana nga nagpanuigon usab og 20-anyos ug 40-anyos misunod sa pagsulod og usa kanila ang mition og .45 kalibreng pistola sa guwardiya nga si Bowen Bugtai.

Gikuha sa maong tulisan ang .38 kalibreng rebolber ni Bugtai.

Si Iylene Janiola, 32, cashier sa maong mga establisamento ug Judith Lumain, 36, appraiser sa pawnshop gipangtionan usab og mga armas sa duha ka tulisan ug gimando nga paablihan ang estante nga gidisplihan sa mga alahas.

Matud ni Noynay nga hapit mahurot og dala sa mga tulisan ang alahas nga display sa maong pawnshop ug nakadala usab kini og salapi nga wala mapiho ang kantidad.

Si Noynay midungag nga ang mga tulisan daling mipahilayo sa lugar sakay sa usa ka Honda wave nga motorsiklo nga kolor pula.

Ang Scene of the Crime Operation (SOCO) mipahigayon og follow-up sa maong insidente.