Paryente ni Cesar M. naghikog

Walay foul play ang nahitabong paghikog sa usa ka negosyante ug paryente sa aktor nga si Cesar Montano nga napalgang nagbitay nga patay na sa sulod sa comfort room sa gipuy-an niining panimalay.

Kini ang nasayran sa Banat News kang PO3 Manolito Abella sa follow up nga gihimo sa homicide section sa kapolisan sa dakbayan sa Lapu-Lapu kagahapon sa buntag.

Si PO3 Abella miila sa biktima nga mao si Carlito Manhilot, 41 anyos, temporaryong nagpuyo sa Mantawe Road sa Poblacion sa maong siyudad ug lumad nga taga Baclayon, sa lalawigan sa Bohol.

Matud pa ni Abella nga sila si Inspector Francisco Baguio nga hepe sa homicide section sa kapolisan sa maong dakbayan ug SPO2 Rolito Jumao-as maoy naghimo og pakisusi niini.

Sa ilang pakisusi maoy nasayran nga napalgan ang patay'ng lawas sa biktima sa sulod sa comfort room nga nagbitik sa liog nga gigamit ang panit nga bakus.

Dugang pa ni PO3 Abella nga ang biktima ug ang asawa niining si Donabel ang nagpuyo sa panimalay nga gipanag-iya sa iyaan niini sa maong dapit.

Si Donabel nga ilang gisukit ni Inspector Baguio ang mitug-an ngadto kanila nga nagbaton og suliran sa nahitabong pagkabangkaruta sa ilang negosyo nga gituohang hinungdan sa paghikog.