ROTC himuong mandatory sa kolehiyo; sugdan sa UP

Sugdan sa University of the Philippines ang pagpatuman sa pinugsanay nga Reserve Officer Training Course sa mga babaye ug lalake nga tinun-an sa kolehiyo.

Kini ang gipadayag ni Defense Secretary Avelino Cruz atol sa unang Philippine Army ROTC National Convention niadtong Domingo. Matud pa ni Cruz nga himoong pilot project ang UP ug isunod dayun ang ubang pangpublikong kolehiyo ug unibersidad lukop nasud una pa ang mga pribadong kolehiyo.

Atol sa nahisgutang conference, usa ka resolusyon ang gipasar nga nag-awhag sa Department of National Defense nga ibalik nga mandatory ang ROTC ug ilakip na ang mga babaye.

Matud pa ni Cruz nga iyang pakig-estoryahan ang committee on National Defense sa Kongreso labot sa gitinguhang kausaban sa National Service Training Program diin gihimo na lang nga optional ang ROTC.

Buot si Cruz nga hatagan og kota ang usa ka unibersidad ug kolehiyo kon pila ka kadete ang ipa-enrol sa ROTC matag semester.

Gipadayag usab ni Cruz nga kadtong mga tarung na nga opisyal sa militar ang himoong commandant sa ROTC aron malikayan na ang mga reklamo sa nangaging katuigan labot sa abuso nga gihimo sa ubang opisyal.

Lakip sa gireklamo ang giingong kurakot nga mga opisyal sa ROTC.

Apan si Col. Guillermo Luyao Jr., group commander sa 7th Regional Community Defense Group, ug Maj. Samson Deles, commanding officer sa 701st Community Defense Center nga maoy nagsuperbisar sa mga ROTC program sa mga tunghaan mipasalig nga limpyohan na nila ang sistema aron malikayan ang mga isyu batok sa ROTC.

Si Deles nagkanayon nga mas maayong amendahon ang balaod sa NSTP aron butangan og probisyon nga maghatag og bug-at nga silot sa mga regular personnel sa Armadong Kusog nga mapamatud-ang mangurakot ngadto sa mga kadete sa ROTC sama sa pagpalagpot niini sa katungdanan.