Traysikol misaliring; 4 angol

Ang mga biktima mao sila si Alicano Puno, 47, minyo ug way trabaho, taga barangay Taytay, Pinamungajan, ug mga estudyante sa Pandakan High School sa barangay Pandakan, Pinamungahan nga sila si Barbara Jay Regis, 13; Joan Cristy Magtagad 14; ug Lilet Yape, 13, ang tanan taga barangay Manguto, Pinamungajan.

Ang drayber sa traysikol nilang gisakyan mao si Rene Puno, hingkod nga taga Manguto, kansang traysikol way certificate of registration ug siya mismo way driver's license.

Ang mga biktima kansang kalawasan nangapiang ug nangabun-og, mibutyag sa kapolisan nga nagbaguros og dagan ang gisakyan nilang traysikol nga gimaniho sa suspetsado, pauli ngadto sa Manguto gikan sa eskuylahan sa Pandakan, dihang pag-abot nila sa Poblacion kalit lang gidasmagan niini ang nag-parking nga traysikol nga gimaneho ni Nestor Navaja.

Gumikan sa kakusog sa pagkadasmag, misaliring ang traysikol nga gisakyan sa mga biktima hinungdan sa nahiagoman nilang kadaot sa ilang kabukogan.

Si PO2 Peter Cuanso Jr. desk officer sa Pinamungajan Police Station nagkanayon nga dako kaayo og tulubagon ang drayber sa traysikol nga nakadasmag, tungod kay siyay pagastuhon sa tambal ug sulod sa Pinamungajan District Hospital.

Dako usab siyag sala kay nagmaneho og sakyanan nga walay lisensya ug wa usay rehistro ang iyang sakyanan.