Ang suspek giilang sila si Edwin Cabase Taburnal alyas Wingwing, 29 anyos, minyo ug Rico Cabase Ricafort nga pulos molupyo sa Sitio YHA, eskina V.Rama ug Englis, Barangay Guadalupe ning dakbayan.
Pinanguluhan ni Senior Inspector Catalino Nacario gironda ang panimalay ni Taburnal pinasikad sa search warrant nga giluwatan ni RTC Branch 15 Judge Fortunato de Gracia gumikan sa kalambigitan niini sa ilegal nga drogas.
Nakuha gikan kang Taburnal ang usa ka medium size plastic ug laing usa ka gamayng plastik nga may sulod nga gidudahang shabu, mga kahimanan sa pagsuyop ug uban pang drug paraphernalia.
Samtang diha sa gawas si PO1 Dennis Labra kinsa maoy back-up security sa nangrondang mga polis nasigpatan niini si Ricafort nga dunay gilabay'ng kolor green nga plastic container diha sa daplin.
Dihang gipunit ni Labra samtang gipugngan si Ricafort nasutang dunay sulod nga lima ka paketeng may sulod nga gidudahang shabu ang maong sudlanan hinungdan nga gidakop usab kini.
Ang mga suspek gikatakdang pasakaan og kaso karong adlawa diha sa korte.