Sunog nagsugod na karong bulana

Mokabat sa P170,000 ang danyos sa duha ka panimalay nga nangaugdaw gikan sa managlahing hitabo dinhi sa lalawigan sa Sugbu. Unang alarma nahitabo sa Upper Labogon,dakbayan sa Mandaue atol usab niining pagsaulog sa fire prevention month sa bulan sa Marso.

Si SFO1 Marcial Vildestre, imbestigador sa Bureau of Fire sa dakbayan sa Mandaue ang miila sa nasunog nga panimalay nga gipanag-iya ni Efren Hiraldizo ug giabangan ni Hulyo Bacalso.'

Gipaubos ni Mandaue City Fire Marshall Oscar Mayol sa second level ang maong sunog sanglit wala na man kini makatapon sa uban pang panimalay sa maong dapit.

Matud pa ni SF01 Vildestre nga ilang nadawat ang alarma alas 10:23 ang takna sa buntag kagahapon ug ilang nakontrol ang kalayo sa paglabay sa dos minutos nilang pagpawong niini.

Si Vildestre miingon nga ang nagsubra nga paggamit sa kuryente ang hinungdan sa kalit nga pag-ulbo sa kalayo.

Dugang pa niya nga atol sa pag-ulbo sa kalayo ug sa ilang pagpawong niini walay gikatahong naangol o nakalas sa kalit nga pag-ulbo sa kalayo.

Samtang laing bahin naugdaw usab ang usa ka balay sa sunog niadtong Sabado sa buntag diha sa Barangay Poblacion, Pinamungajan.

Mikabat sa P90 mil ang danyos sa nahisgutang sunog apan walay gikataho nga naangol.

Si PO3 Romeo Jaravilla polis sa pinamungajan mibutyag kagahapon sa Banat News nga faulty wiring ang hinungdan sa nahisgutang sunog og diha magsugod sa kwarto sa balay.

Matud ni Jaravilla nga adunay mi-spark dapit sa kesame sa kwarto og dali kaayong mikuyanap ang kalayo.

Ang maong balay gipanag-iya sa magti-ayong Edelberto ug Contancia Quiamco.

Ang Toledo city fire ang unang nakaresponde sa sunog ug misunod ang Barili fire.

Ang mga residente sa lugar mibasol sa kabomberohan sa Pinamungajan tungod kay wala kini makaresponde sa hitabo kay ang fire truck walay krudo.

Apan gitataw ni Jaravilla nga adunay deperensiya ang makina sa ilang fire truck og naatol gyud kining nadaot nga dunay nahitabong insidente hinungdan nga wala kini makaandar.

Si Jaravilla nagkanayon nga gigama sa mga gaay nga materyales ang balay sa magti-ayong Quiamco hinungdan nga dali kaayo kining gikaon sa kalayo.