Polis napatiran, barangay kap nasukmagan sa gipanakop

Naigo sa patid sa 19-anyos nga lalaki ang usa ka polis sa Talisay kinsa miresponde sa nahitabong gubot niadtong milabayng adlaw diha sa usa ka resto bar sa Barangay Lawaan 2.

Nagtingkagol sa Talisay detention cell si Niño Basmayor residente sa Barangay Biasong tungod sa pagpamatid niini ni PO2 Rico Emperwa nga nadestino diha sa Talisay police station sa Poblacion ug pagtukmod niya ni Rey Oliver Birador kapitan sa nahisgutang barangay og maayong pagkatumba sa maong kapitan diha sa karsada.

Gibutyag ni PO2 Leandro Azarcon sa Banat News nga si Basmayor kostumer sa Princes resto bar kinsa nasuko ni Birador tungod kay gibadlong niini ang operator sa sound system nga pahinayan ang tukar sa sound system tungod kay ang mga residente diha sa duol mireklamo.

Giduol ni Basmayor si Birador kinsa diha sa gawas sa resto bar og gitukmod.

Tungod sa maong insidente nanawag si Birador og polis para moayuda niya sa pagsikop ni Basmayor.

Apan si Emperwa nasugamak og duha ka patid sa dughan ni Basmayor. Hinungdan nga gitabangan kini og signit sa nahisgutang kapitan ug polis.

Sa laing bahin usab usa ka amahan ang nagtingkagol diha sa Talisay detention cell niadtong Biyernes tungod sa pagkulata niya sa iyang anak ug pagsukmag niya sa kapitan sa Barangay Mohon.

Ang napriso mao si Michael Bondoc 26-anyos residente sa maong lugar.

Si Bondoc naatlan ni Dario Villaver kapitan sa barangay nga giinat niini ang dunggan sa iyang siyete-anyos nga anak og giisa.

Hinungdan nga gibadlong kini ni Villaver apan nasuko si Bondoc sa pagpamadlong sa kapitan.

Hinungdan nga giatubang ni Bondoc si Villaver og gisukmag apan nagunitan sa mga tanod ang bungton niini og gideretso na kini og signit og gitugyan sa kapolisan.