Fish feeding sa Talisay sa FISECA

Gilusad kagahapon sa buntag ang fish feeding o pagpanglawog sa mga isda diha sa La Gundi usa ka fish sanctuary sa dakbayan sa Talisay.

Ang maong lugar adunay gilay-on nga duha ka kilometro gikan sa baybayon sa Barangay Poblacion.

Ang nahisgutang fish sanctuary adunay gilapdong lima ka ektarya ug giprotektahan karon sa kagamhanan sa dakbayan.

Makita sa maong sanctuary ang mga buhing staghorn corals, green staghorn ug table size coral, angel fish, butterfly fish ug uban pang mga gagmay'ng isda.

Kagahapon giduaw sa grupo sa Fishermen Sea Ecological Care (FISECA), Talisay Swimming and Life Saving uban sila si konsehal Shirley Belleza tsirman sa Tourism and Historical Affair, Arlyn Vailoses head sa Provincial Marine Resources ug Joseph Libres sa Provincial Environment Natural Resources Office (PENRO) ang La Gundi reef.

Ang maong mga grupo misawom ilawom sa dagat dala ang mga bahaw nga pan sa Julies Bakeshop ug maoy gilawog sa mga isda.

Si Vailoses nagkanayon nga ang mga isda sa nahisgutang sanctuary dili pa mga anad ug kinahanglan nga matag adlaw magpahigayon og pagpanglawog.

Matud ni Vailoses nga adunay mga bag-ong mga gasang nga mitubo diha sa La Gundi reef ug kinahanglan nga mentinahon sa siyudad ang pagprotekta niini para dili kini maguba sa mga mopahigayon og mga ilegal nga pangisda.