Drug dens sa Lapu-Lapu bungkagon

Mga istraktura nga gigamit nga suyopanan sa mga adik diha sa Lapu-Lapu ipalarot sa hepe sa kapolisan sa maong dakbayan.

Gitataw kagahapon ni Deputy Police for Operation Jonathan Pineda sa kapolisan sa Lapu-Lapu nga niadtong Lunes mihatag og kamanduan si Police Superintendent Louie Oppus hepe sa kapolisan sa dakbayan sa tanang precinct commanders nga magpahigayon og pakisusi sa tagsa-tagsa nila ka lugar kabahin sa mga drug den o soyupanan sa mga adik.

Matud ni Pineda nga niadtong Lunes mipahigayon dayon og pakisusi ang mga precinct commander ug karong adlawa (Biyernes) ipasumiti ang ilang report nga resulta sa ilang gipahigayong kalihokan.

Si Pineda nagkanayon nga ipalarot ni Oppus ang mga istraktura nga mapihong gigamit nga suyopanan ilabi na nga gitukod kining walay mga permit gikan sa kagamhanan sa dakbayan.

Si Pineda midungag nga kasagarang gamiton sa mga adik nga suyopanan mao ang mga gi-abandonar nga mga istraktura.

Ang dakbayan sa Lapu-Lapu maoy usa sa mga dakbayan sa Metro Cebu nga naapektahan na sa pagkuyanap sa gidiling drogas.

Apan ang maong mga problema misumbalik karon sa mga drug pushers sa ilang dakbayan nunot sa mga gipangusgang operasyon sa kapolisan sa mga nangaging adlaw.