Gagmay'ng botika mipalag

Mga tag-iya og gagmay nga botika dinhi sa dakbayan wala makagusto sa pamahayag ni konsehal Cristopher Alix nga ingon sa nag-discourage sa katawhan pagpalit og tambal gikan sa ilang balay-patigayon.

Ang mga tagdumala og gagmay'ng botika diha sa T. Padilla; Tres de Abril, Labangon; C. Padilla sa Mambaling ug diha duol sa Cebu City Medical Center mihulagway sa pamahayag ni Konsehal Alix nga makadaut sa ilang negosyo.

Si Alix miingon nga dunay mga opisyal sa kahugpongan sa mga tag-iya og botika dinhi sa dakbayan nga mitug-an kaniya nga ang sagad mamaligya og mga fake ingon man hupas nga tambal mao ang gagmay nga botika.

Nagkapareho ang pamahayag sa mga tagdumala og gagmay'ng botika dinhi sa dakbayan nga angay'ng ilhon g'yod ni Alix ug sa kadagkoan sa Department of Health ang mga botika nga nalambigit og binuang.

Ang DOH maoy mibutyag nga dinhi sa Sugbo dunay 69 ka botika nga namaligya og fake ug hupas nga tambal. Sa maong gidaghanon, 21 sa maong mga botika ania mahimutang sa dakbayan sa Sugbo.

Naglaum si Konsehal Alix nga unta ang kahugpungan sa mga tag-iya og botika maoy mangunay sa pagsumpo sa binuang sa ilang mga sakop.

Ang kadagkoan sa Bureau of Food and Drugs dinhi sa Sugbo mapanagan-on usab nga mobutyag sa ngalan sa mga botika nga ilang nasakpan nga nakahimo og kalapasan.

Apan nahibaw-an nga dunay mga botika dinhi sa dakbayan, sagad mga gagmay nga napahamtangan og silot tungod sa lainlaing kalapasan sa miaging tuig.