ROTC gitinguhang ibalik sa tunghaan

Nunot niining nagkunhod nga gidaghanon sa mga tinun-an sa kolehiyo nga mikuha sa Reserve Officers Training Course (ROTC) pabor sa National Service Training Program, gitinguha sa kadagkuan sa mga ROTC Corps Commanders nga mosumiter og resolusyon nga mahimong mandatory ang ROTC sa mga state colleges ug makatugbang sa kasamtangang NSTP.

Si Col. Guillermo Luyao Jr., ang group commander sa 7th Regional Community Defense Group, Army Reserve Command sa press conference kagahapon sa Army Reservist Center sa Central Command miangkon nga gumikan niining NSTP sa kolehiyo mimenus og dako ang mga nanguha og ROTC.

Matud pa ni Luyao nga ang ROTC ra maoy tinubdan sa militar ug mga sakop panahon nga dunay gubat sa nasud. Kun wala niini dili masigurong makalahutay ang nasud sa bisan unsang pagpangatake.

Giisip karon sa militar nga ang mga tinun-an wala na kaayo magpakabana sa pagpakita'g pagmahal sa nasud ug gisulsolan pa sa mga grupong kontra ROTC nga wala sab magpakita sa ilang pagmahal sa nasud kun dili ang ila rang kaugalingong kalambuan kun silay mabutang sa puwesto.

Karong adlawa ilusad ang Ist National Annual Corps Commanders Convention diha sa Ecotech sa barangay Lahug, diin iumol sa grupo ang resolusyong ipaabot ngadto sa kongreso aron amendahan ang kasamtangang Akta Republika 9163, ang balaod sa NSTP.

Matud pa ni 701st CDC commanding officer, Major Samson Deles nga ang mga state colleges compulsory gyud unta nga motangag og ROTC sa ilang mga tinun-an, apan sa pagkakaron nahimo na lang kining optional ug gipalabi ang NSTP.

Ang NSTP dunay nagkadaiyang programa diin ang mga tinun-an gitudloan unsaon pagserbisyo sa katilingban, sama sa pagpananom og kahoy, pagpanglimpyo, pagbisita sa mga balay dangpanan ug uban pa gawas lang sa pag-martsa ug pagtuon og mga taktika sa panggubat nga maoy kasagarang gihimo sa ROTC.

Sa nanglabay'ng panahon, ang ROTC nagkaanam og kawala sa pagdani sa mga tinun-an, kini naggumikan sa mga pasangil nga mga kurakot ang mga nagdala niini uban pa sa mga anomaliya.

Sa usa ka normal nga nasud nga dunay programang ROTC, ang mga reservist giisip nga mas dako og puwersa kun sa gidaghanon ang hisgutan apan dinhi sa Pilipinas sa pagkakaron duna ray 74 ka mga Ready Reserve Battalion nga gibase matag probinsya ug ang uban kanila mao ang Standby Reserve kun dunay nakahuman ra sa ROTC apan wala na mopakita og balik sa ilang mga units human motapos sa ilang pagtungha.