Porno DVDs, VCDs nasakmit sa BOC

Mga pornographic DVDs ug VCDs nasakmit sa mga sakop sa Customs Intelligence Service ug Optical Media Board diha sa customs warehouse sa Mactan kagahapon sa hapon.

Gibana-banang 30,000 ka mga CDs nga gikan pa sa Manila nga gipanulod og mga dagkong kahon ang giablihan sa Customs ug sa OMB pinanguluhan ni OMB chairman Edu Manzano.

Matud pa ni Francis Muñoz ang Customs Intelligence Supervisor nga niadto pang Pebrero 15 nila nadawat ang impormasyon kabahin sa usa ka bagaheng gikarga sa usa sa mga abyon gikan sa Manila .

Giingong walay klaro ang mga pangalan sa mga consignee niini nga sila si Shen, Jeson Garcia, Mimie E., Anna A., Jam Store ug Liomar nga dihang ilang gisubay ang mga address wala kini sa maong mga lugar.

Hinuon giklaro ni Muñoz nga walay tulubagon ang mga abyon nga nagkarga niini gumikan kay susama sa ubang mga carriers igo lang sila nagkarga ug naghatud sa maong mga bagahe gawas lang kun duna gyuy ebidensyang magtumbok kanila nga nalambigit sa pagpalusot.

Samtang si Manzano nagkanayon nga posibleng ang source sa mga disc diha ra sa Manila o ba kaha ang Manila maoy central distribution point.

Giplanuhan usab nga ipagaling ang maong mga CDs aron ang mga nadugmok nga parte ipa-bidding sa kung si kinsa ang interesadong mopalit sanglit matud pa nga mahimo kining i-recycle ngadto sa mga plastik mga butang.

Subayon usab pinaagi sa mga forensic experts ang mga gihulagway nga coded numbers diha sa maong mga CDs nga ilang gituohang maoy mogiya kanila diin ang mga manufacturer niini magbase.