Granada gigabas sa 2 bata

Naukay ang mga taga Lawaan III sa Talisay tungod sa usa ka MK2 fragmentation grenade nga napalgan sa mga batang basurero kagahapon sa buntag diha sa maong barangay.

Matud ni kapitan Joel Nacor ang granada gabson unta sa maong mga bata tungod kay ila kining bahinon.

Apan suwerte kay sa wala pa magabas ang granada nakit-an ni Annaliza Abrenica nga residente sa Sityo Saging, Lawaan III nga gibitbit sa maong mga bata.

Daling mitawag si Abrenica sa buhatan ni Nacor aron mataho ang maong insedente.

Si Nacor nagkanayon nga diha sa Lagtang nakuykoyan sa mga batang basurero ang maong granada nga ilang gitugyan sa kapolisan sa Talisay.

Ang nahisgutang granada gikuha kagahapon ni SPO2 Ceferino Camacho sa Bomb Disposal Unit sa Cebu Provincial Police Office (CPPO).

Lakip sa gikuha ni Camacho ang duha ka vintage bomb nga nakuykoyan usab sa usa ka basurero diha sa Cansojong sa milabay'ng tulo ka adlaw. – Brenda D. Batuto