10 ka barangay kadawat salapi

Dili mominos napulo ka mga urban barangays dinhi sa dakbayan sa Sugbo ang makapahimulos sa hinabang pinansiyal nga gitanyag sa kagamhanan sa dakbayan sa Sugbo.

Kini human ang maong mga barangay napamatud-an kini nga seryoso ug aktibo sa pagsuporta sa programa sa siyudad nga Oplan Pakigsandurot nga gitumong pagpatunhay sa kahusay ug kalinaw gikan sa kabarangayan.

Si Konsehal Procopio "Coping" Fernandez, tsirman sa committee on police fire and penology maoy mipasar ug resolusyon aron mangayo og pundo sa siyudad alang ning maong katuyoan.

Ang mga barangay nga makadawat sa maong insentibo gilangkoban sa Sawang Calero nga makadawat og P150 mil, Duljo-Fatima P150 mil, San Nicolas-Proper P120 mil, Suba ug Calamba P100 mil kada usa, Buhisan P60 mil, Pasil P50 mil, Cogon Pardo P40 mil, Basak San Nicolas P30 mil ug Tisa P20 mil.

Ang maong gahin gamiton kini alang sa pagpamalit og mga ekipo nga mapahimuslan sa maong mga barangay aron mapalig-on pa niini ang programa Oplan Pakigsandurot diha sa ilang tagsatagsa ka lugar.

Ang maong programa usa kini ka kalihukan nga boluntaryong magtinabangay ang mga sibilyan ug mga polis nga molupyo sa tagsa tagsa ka lugar aron moabag kini sa pagpatunhay sa kahusay ug kalinaw pinaagi sa pagsumpo sa mga dautang kalihukan ug uban pang mga kriminalidad.

Si Fernandez miawhag ngadto kang Mayor Tomas Osmeña aron hatagan og insentibo kadtong mga barangay nga aktibo ang Oplan Pakigsandurot aron mas madasig pa kini pagpadayon sa maong programa.