Motor mipilit sa bato; 2 patay, 1 kritikal

Duha ang patay ug laing usa ang kritikal ang kahimtang human mosampak ang usa ka motorsiklo ngadto sa koral nga bato daplin sa karsada niadtong miaging gabii sa Bitoon, Dumanjug.

Sila si Florante Altobar, taga Hilosgasan, Barili ug Rudy Villardor, taga Hapitan, Barili, pulos namatay sa Barili District Hospital. Si Altobar maoy nagmaneho sa motorsiklo.

Ang kritikal sulod sa Vicente Sotto Memorial Medical Center mao si Salvador Emedio, taga Hilosgasan, Barili. Si SPO1 Raymundo Sala sa Dumanjug Police Station nagkanayon nga ang tulo ka managhigala gikan nga namisita sa dihang kusog nga nagpadagan paingong mamauli.

Pag-abot sa kubadahon nga karsada nawad-an sa kontrol si Altobar sa manibila hinungdan nga mideretso kini sa koral nga bato. Mipilit sa pader ang tulo.

Sumala pa ni SPO1 Sala nga daghan nang motorsiklo nga nadisgrasya sa maong lugar.