PNP chief giplanohang kidnapon

Planong pag-kidnap kang Philippine National Police Director General Arturo Lomibao gibutyag sa usa ka heneral. Matud pa niini nga lakip kini sa planong pagpalagpot sa pamunoang Arroyo sa mga kalaban sa gobyerno sumala pa sa taho gikan sa ANC.

Kini maoy gibutyag ni Lomibao ngadto sa mga sakop sa media sa Manila Overseas Press Club niadtong Martes sa gabii. Matud pa niya nga maong gisuportahan niya ang proklamasyon ni Presidente Gloria Arroyo sa national state of emergency gumikan usab sa maong hulga.

Niadtong Enero 13, 2006 giingong nadawat sa heneral ang maong impormasyon nga sa ika-14 sa samang bulan sulngon sa pipila ka mga sakop sa Special Action Force sa PNP ang Camp Crame ug Ninoy Aquino International Airport ug i-hostage siya ug pugsong modeklarar nga iyang gitalikdan ang gobiyernong Arroyo.

Matud pa ni Lomibao nga gamay kaayo ang rason aron bakwion na ang proclamation 1017 sa pagkakaron sanglit duna pa gyuy hulga sa seguridad sa presidente ug sa gobiyerno karon bisan paman nga nabisto na kini.

Giingong dunay mga impormasyong mikatap sa kauluhan nga ang mga utok sa destabilisasyon dunay "Final Talk 2" nga pagahimuon ning mosunod nga adlaw aron ilusad karong Marso 31 ang planong pagmartsa pangadto sa Malacañang nga langkuban og 200,000 ka mga tawo.

Kun mapakyas kini magpadayon kini hangtud sa Mayo 1, ug ilang paninguhaong moabot sa 500,000 ka tawo ang mosalmot.

Apan sa namatikdan karon bisan paman sa mga paaging gihimo sa mga utok sa pagguba sa gobiyerno, wala na kakitai og interes ang kinabag-an sa mga Pilipino nga mosalmot pa sa lain na usab nga protestang susama sa Edsa One.