Duha gipamusil sa Dumanjug

Nalandig sa tambalanan ang duha ka lalaki kinsa gipamusil sa wala mailhing tawo niadtong Domingo sa gabii diha sa Barangay Lawaan lungsod sa Dumanjug.

Si Preciliano Dinopol, 28-anyos, nakaangkon og samad pinusilan sa iyang suwang ug Pedro Walog nakaangkon usab og samad pinusilan sa iyang walang paa, ang duha pulos mga residente sa nahisgutang barangay daling gidala diha sa Vicente Sotto Memorial Medical Center niining dakbayan.

Si SPO1 Raymundo Sala polis sa Dumanjug nagkanayon nga si Dinopol ug Walog naglingkod sa ilang motorsiklo samtang nag-istoryahanay kini diha sa lugar nga nahitabo ang insidente.

Usa ka lalaki nga nagsul-ob og fatigue nga uniporme kalit nga migawas sa ngitngit ug sa walay pangutana mipauwan og bala ni Dinopol ug Walog.

Ang kapolisan sa Dumanjug nag follow-up na sa maong insidente.