Bag-ong patrol car sa MCPO

Dugang 21 ka sakyanan sa kapolisan sa Mandaue City Police Office (MCPO) ang gitugyan ni Mayor Thadeo Ouano sa tinguha niining molambo ang ilang serbisyo sa pagpatuman sa kahapsay ug kalinaw sa dakbayan.

Ang pagtugyan ni Mayor Ouano sa mga sakyanan sa kapolisan ang natigayon kagahapon sa buntag sa atubangan sa city hall nga gitambongan usab sa mga pipila ka mga konsehal ug mga department heads.

Naglangkob sa maong mga sakyanan ang van type nga terrano ug multicab nga magtalikod ang mga maglingkod nga polis nga magsakay.

Si Senior Superintendent Eduardo Catabas nga maoy direktor sa kapolisan sa maong dakbayan maoy midawat sa maong mga sakyanan ug moapod-apod usab niini ngadto sa iyang mga sakop.

Sa pagpakighinabi kang Ouano sa Banat News iyang gipadayag nga ang dugang sakyanan sa kapolisan kabahin na sa pagpangandam sa Asean Summit karong Disyembre niining tuiga.

Si Mayor Ouano miingon nga pasiuna pa lamang ang maong dugang mga sakyanan sa kapolisan sa dakbayan tungod kay may umaabot pa gayod niini sa sunod pang mga bulan.