CENTCOM nagpaduol sa mga bukirong mga barangay

Militar mipangusog sa ilang mga programa aron mapaduol sa kasing-kasing sa katawhan ilabi na sa bukirong mga barangay diha sa dakbayan sa Toledo.

Nagmalampuson ang gilusad nga Medical and Dental Civic Action Program (MEDCAP) sa 701st Community Defense Center, sa 7th Regional Community Defense Group sa Central Command niadtong milabay'ng Pebrero 18 diha sa barangay Bagakay sa nahisgutang lugar.

Ang maong tawhanong misyon gilusad inabagan sa mga sakop sa Centcom pinanguluhan ni CDC commander, Major. Samson Deles ilawom sa pagdumala ni Col. Guillermo Luyao Jr.ug lokal nga kagamhanan sa Toledo pinanguluhan ni Mayor Arlene Zambo.

Dunay 252 ka mga residente sa maong barangay ang nahatagan og libreng medical check-up ug mga medisinang gikan sa Philippine Charity Sweepstakes Office (PCSO), samtang dunay 15 ka tawo usab ang nahatagan og dental service niadtong higayuna.

Samtang ang mga municipal health officer sa City Health Office sa maong dakbayan mihatag usab og libreng blood pressure check-up ug mitudlo usab sa hustong kalimpyo sa panglawas ug sa palibot.

Ang medical corps sa militar pinanguluhan usab ni Col. Eugenio Mislang, samtang ang dental team naggikan sa Cebu Dental Society nga sila si Dr. Josephine Enoc, Dr.Janice Baccay, Dr. Rosemarie Buhay-Luyao ug Dr. Angie Corronado.

Ang mga sakop usab sa 78th Infantry Battalion maoy naghatag og seguridad sa maong kalihukan.