UV alumni giawhag sa pagtabang sa St. Bernard

Nanawagan ang executive vice president sa University of the Visayas Dr. Jose "Dodong" Gullas ngadto sa tanang miyembro sa UV Alumni ug sa mga kahigalaan nga mosalmot sa gilusad nga kampanya nga gitumong aron paghatag og hinabang ngadto sa mga nabiktima sa nahitabung landslide didto sa barangay Ginsaugon, St. Bernard Southern Leyte.

Kining maong donation drive gitawag og " Bunga sa Gugma" nga gipahaum usab sa nagsingabot nga ika-101 ka tuig nga kasumaran sa adlaw'ng natawhan ni Doña Josefina R. Gullas karung petsa 13 sa bulan sa Marso.

Giawhag ni Gullas ang mga sakop sa UV Alumni ug mga kahigalaan nga mohatag bisan gamay nga hinabang ngadto sa mga biktima sa trahedya ma salapi o bisan unsang butang nga mapahimuslan sa mga biktima.

Ang tanang mga madawat nga donasyon usahon kini sa pagpadala sa mga biktima didto sa Southern Leyte dungan sa kita sa gipahigayong solicitations sa mga magtutudlo, staff ug tinun-an sa maong tunghaan.

Ang UV Alumni Center nga nahimutang diha sa dalan Sanciangko ning dakbayan padayon karong nanawat sa mga ipadangat nga hinabang ma salapi o relief goods o matawag sa telepono 254-7604 ug 254-0966.