Babaye giluba sa laing babaye

Usa ka babaye nakabaton og samad sa bukobuko human kini mabiktima sa pagpanunggab sa laing babaye nga silingan lamang usab niini.

Nahitabo ang pagpanunggab alas 8 pasado ang takna sa miaging gabii sa ilang panimalay nga nahimutang sa sitio Humay-Humay, Pajo, Lapu-Lapu.

Si Lea Santiago, 34 anyos, nadunggaban ni Marissa Belayo, 36 anyos. Ang duha pulos ug managsilingan sa maong dapit.

Si P03 Manolito Abella sa Homicide Section sa kapolisan sa maong dakbayan nga gikahinabi sa Banat News miingon nga ang duha naglalis tungod sa mga intriga sa usa'g usa.

Ang suspetsado nga wala na makapugong sa gibati niining kapungot nakapunit og kutsilyo sa kusina ug gihansakan ang buko-buko sa biktima.

Dali nga gitabang sa mga silingan ang biktima ug gidala kini sa Opon District Hospital ug human sa pasiunang pagtambal gibalhin kini sa Vicente Sotto Memorial Medical Center sa dakbyan sa Sugbo.

Matud pa ni P03 Abella nga ang suspetsado nga ilang naabtan sa maong dapit ilang gidakop ug gibalhog sa bilanggoan.