Gipusil paglabay sa balay

Gipusil ang usa ka lalaki nga padulong na untang mopauli sa iyang pinuy-anan, samtang kini naglakaw daplin sa dalan niadtong miaging hapon didto sa Malolos, Barili.

Si PO2 Lenlen Ricaplaza ang desk officer sa Barili Police Station nga nahinabi sa Banat News miila sa biktima mao si Jizil Villaren, 24, ulitawo, samtang ang suspetsado si Andro Marabillas hingkod ang panuigon, ang duha pulos nagpuyo sa nahisgutang barangay.

Base sa gihimong imbestigasyon sa kapulisan sa Barili Police Station, nasayran nga pagdumot ang hinungdan sa pagpusil sa suspek ngadto kang Villaren.

Midugang si PO2 Ricaplaza nga samtang naglakaw ang biktima daplin sa dalan, pag-agi sa balay sa suspek kalit kining gipusil ka upat ka mga higayon, ug usa lang ang niigo sa tuo niyang paa ginamit ang wa pa matino nga kalibre sa armas nga maoy gigamit ni Marabillas.

Ang kapulisan sa lungsod dali kining niadto sa nahitaboan apan pakyas sa pagsikop sa suspek, sanglit daling nakasibat palayo sa dapit.

Ang biktima gidali pagdala sa mga kabanay sa usa ka klinika nga naa mahimutang sa Poblacion, apan paglabay sa pipila ka gutlo gibalhin ra usab dayon sa Vicente Sotto Memorial Medical Center sa dakbayan sa Sugbo.