Laing gasolinahan sa Lapu-Lapu gitulis

Nagbinugtong nga tulisan nga nagsakay og motorsiklo nanulis na usab og gasoline station sa Basak, sa Lapulapu niadtong miaging adlaw human sa gihimo niining pagpatubil.

Ang gitulis mao ang Providence Petron Gasoline Station nga gipanag-iya ni Patricia Tan sa Apas, ning dakbayan sa Sugbo.

Kini maoy ikaduhang gasoline station sa dalan Maximo Avenue sa Pajo nga maoy unang gitulis sa maong dakbayan nga nakuhaan usab og dakong kantidad nga salapi.

Hinuon mokabat lang sa P2,800 nga kantidad ang nasakiyo sa maong tulisan sanglit ang uban kita niini nahipos na man sa tag-iya sa maong gasoline station.

Sa pagpakighinabi sa Banat News kang SPO1 Andres Gahi sa Theft and Robbery Section sa kapolisan sa maong siyudad nahibaw-an nga nagpatubil pa ang maong tulisan og break fluid sa giluwanang motorsiklo nga XRM nga kolor blue.

Kini ang gitug-an kanila kang SPO1 Gahi sa cashier sa maong gasoline station nga si Romuen Limpangog, 19 anyos, ulitawo nga taga sitio Suba Masulog, Basak sa maong siyudad.

Dugang pa niya nga gawas sa maong kantidad, ang kargadang armas nga kalibre 38 nga gisulod sa bag sa nahisgotang kahera gilakip pa sa pagsakiyo.

Matud pa ni SPO1 Gahi nga sumala sa gitug-an sa kahera ngadto kanila nga nagtuo kining ang bayad sa break fluid ang gitunol apan nahingangha na lang dihang maoy nakita ang gition nga armas.

Dungan sa pagtion mao ang pagdeklarar nga tulis ug gihurot sa pagpangayo ang tanang halin niadtong adlawa.

Si SPO1 Gahi miingon nga nagpadayon karon ang ilang follow up sa maong pagpanulis alang sa pag-ila sa wala mailhing lalaki nga ilang gitan-aw nga may kuyog maoy lookout sa maong pagpanulis.