Kini ang nasayran sa Banat News sa follow up nga gihimo sa buhatan sa Criminal Intellegence and Investigation Bureau (CIIB) sa Cebu City Police Office (CCPO) kagahapon sa buntag.
Si JO1 Ariel Capilla, 34 anyos usa ka jail guard nga lumad nga taga Calasgaan, Bais, Negros Oriental nadestino sa BJMP-Regional Office 7 sa Capitol Site niining siyudad nadakpan sa akto nga nagsuyop og shabu.
Gitanggong karon sa sulod sa detention cell sa CIIB si Capilla ug gipaabot ang pagpaatubang niini sa korte sa kasong ipasaka batok kaniya.
Ang pagdakop natigayon sa miaging adlaw atol sa ronda nga gihimo sa sulod sa usa ka panimalay sa gituohang drug den nga nahimutang sa Lawis Pasil, siyudad sa Sugbo.
Ang team sa CIIB nga gipangulohan ni SP01 Felomino Mendaros ug mga sakop sa Barangay Intelligence Network (BIN) maoy nakasikop kang Capilla nga mipahigayon sa pagronda.
Ang mga ebidensiya nga nasakmit atol sa pagkasikop ni Capilla mao ang pipila ka pakete sa shabu, mga aluminum tin foil nga nalakip sa uban pang kahimanan sa paggamit ug kalibre .45 nga may magazine uban sa buhing mga bala niini.