Leyte di luwas panahon sa amihan

Ang mga lalawigan sa Leyte dili makalikay sa dakong hulga sa mga natural nga kalamidad sa panahon sa ting-amihan ang hangin ug ting-uwan.

Kini ang gipasabot ni Alex Padin, weather forecaster sa Philippine Atmospheric Geophysical and Astronomical Services Administration (PAG-ASA) Mactan.

Matud pa ni Padin nga ang Leyte maoy bukana sa dagat Pasipiko diin magikan usab ang hanging amihan.

Matud pa niya nga ang mga panganod ug dag-om nga magikan sa Pasipiko ibulhot sa amihan nganha sa Leyte busa anha mobundak pag-ayo ang baga nga uwan.

May mapadpad man nga mga dag-om ug uwan sa ubang bahin sa Central ug Western Visayas, apan pinisik nalang kini sa grabeng uwan nga mobundak sa Eastern Visayas nga maoy nagsakop sa Leyte.

Ang laing hinungdan nganong dali ra makadahili ang yuta sa Leyte mao ang kahaguka sa ilawom niini mugna sa klase sa iyang mga bato ug yuta.

Matud pa ni Padin nga lahi ang bato sa Leyte kay may pagkasinawon nga susama ra sa bato sa sapa.

Ang yuta usab niini dili kaayo pilit kay may sagol man nga balas, ug maoy hinungdan nga sa panahong makapundo na ang tubig sa uwan sa ilawom sa yuta, humok nalang kini kaayo.

Ang way bugto nga pag-uwan maoy maghagit sa haguka nga yuta nga modahili kay wala may lig-ong mopugong niini sa ilawom tungod sa kasinaw ug kadangog sa iyang mga bato ug ang yuta dili makapilit tungod kay may sagol nga bas.

Miingon si Padin nga ang mga bungtod o bakilid nga may hait ug bantilis nga mga bato, lig-on busa wala gayuy pagdahili, tungod kay motabang man kini sa pagpugong sa yuta.