Binuang sa ATM ipa-monitor

Naalarma ang mga Sugboanon niining modus operandi diha sa ATM machines nga mahulagway nga usa ka matang sa pagpanulis sa atubangan sa publiko ilabi na niadtong mag-withdraw og salapi pinaagi sa ATM booth.

Gumikan niini, ang kapolisan sa dakbayan sa Sugbo pinangulohan ni Supt. Melvin Gayutin miluwat na og pahimangno ngadto sa publiko kabahin ning maong modus operandi nga pagmaniobra sa mga badlongon diha sa mga ATM machines aron dili mogawas ang gi-withdraw nga kuwarta gumikan kay ma-stock up man kini sa ibangil nga butang.

Sagad nga nahitabo kining maong binuang didto sa dakbayan sa Lapu-Lapu ug karun lang bag-o nadiskubrihan kining maong binuang nga miabot na dinhi sa siyudad sa Sugbo human usa ka magtiayon ang nabiktima niini dihang nag-withdraw kini sa usa ka ATM machines sa may Talamban.

Maayo na lang gani kay mitawag og polis ang maong magtiayon dihang walay kuwarta nga migawas bisan og gi-deduct na sa resibo ang kantidad nga gi-withdraw niini.

Tungod niini, mipalabang og resolusyon si konsehal Arsenio Pacana nga nag-awhag sa Bangko Sentral ng Pilipinas sa posibling pagbutang og hidden cameras nga magmonitor sa mga ATM outlets sa gawas nga bahin sa bangko 24 oras.

Tumong niini nga madiskubrihan ang grupo nga maoy responsable sa pagbutang og bangil sa mga ATM machines aron mo-stock up ang salapi nga i-withdraw og sila na maoy mosunod sa pagkuha niini.

Laing gisugyot sa giduso nga resulosyon sa konsehal ang pag-awhag sa Cebu Bankers Association nga batasanon niini ang pagbutang og permanenting guwardiya sa mga ATM outlets niini sa gawas sa bangko.