Text fund drive para Guinsaugon

Gisugdan kagahapon sa Globe Telecom ang proyekto nga gitawag og TEXT TO HELP fund drive alang sa mga biktima sa landslide sa Southern Leyte.

Ang mga subscribers sa Globe Telecom ug Touch Mobile gidasig sa pagpadala og text message nga HELP[space]LEYTE sa 2340 aron makadonar og P2.50 ngadto sa mga biktima sa landslide.

Makita usab kon pila na ang natigum nga donasyon pinaagi sa pag log on sa www.helpleyte.com.

Ang maong proyekto nga molungtad hangtud sa Marso 9 ning tuiga giabagan sa nagkalainlaing sektor sa Sugbo sama sa Innove Communication, Kapisanan ng mga Brodkaster sa Pilipinas, Cebu Jaycees, Payvenue ug uban pang pondok nga naningkamot nga makahatag og donasyon ngadto sa Southern Leyte.

Kagabii, gipahigayun usab ang konsyerto sa mokabat 40 ka banda ug mga mag-aawit sa Sugbo sa Fuente Osmeña alang gihapon sa maong katuyuan.

Gawas sa text message, giawhag usab sa grupo ang publiko nga mopadala sa ilang mga donasyon sama sa mga senina, sapatos, habol, tulda, noodles, tubig ug mga de lata nga pagkaon sa Fuente Osmeña Drop-in Center.

Ang Globe Telecom modawat usab sa mga donasyon sa lobby sa IT Park sa dakbayan sa Sugbo ug kini direktang ipadala sa kagamhanang probinsiyal sa Southern Leyte diin nasakop ang barangay Guinsaugon, lungsod sa St. Bernard.