Si SPO4 Teofilo Deguilmo nga nahinabi sa BANAT NEWS miila sa biktima nga si Genes Fajardo, 49, nagpuyo sa Suba, Danao, samtang ang nakapusil mao si Rene Boy Lawas, 39, minyo, asset sa Danao Police Station.
Base sa pasiunang imbestigasyon nga gihimo sa kapolisan sa Danao City Police nga mikaon ang biktima sa Tapsilog store nga naa nahimutang sa nahisgutang siyudad, kalit miabot ang suspek nga si Lawas ug duha niini ka mga kauban, si Chili Enriquez ug SPO1 Nilo Pantoja kinsa kasamtangan nadestino sa Danao.
Matud ni Deguilmo nga nakainom ang suspek sa nahisgutang tindahan, kalit lang nitumaw ang panaglalis sa biktima ug ang suspek. Si Lawas kalit mibunot sa dala niyang armas dayong pusil sa biktima hinungdan nga naigo ang biktima sa walang tiil.
Ang biktima gidali pagdala sa Danao District Hospital apan gibalhin sa Vicente Sotto Memorial Medical Center. Hinuon ang biktima luwas na sa makuyaw nga kahimtang. Paglabay sa pipila ka oras human sa maong hitabo gipasurender ni Pantoja ang suspek ngadto sa buhatan sa kapolisan.